पदबाट राजीनामा दिने तयारीमा सभामुख महरा, ओली र प्रचण्डबीच वालुवाटारमा छलफल

0

काठमाडौं– सभामुख कृष्णबहादुर महराले पदबाट राजीनामा दिने तयारी गरेका छन् ।

सत्तारुढ नेपाल कम्युनिस्ट पार्टीका केही नेताहरुले आफूमाथि लागेको आरोपको सत्यतथ्य छानबिनका लागि राजीनामा दिन महरालाई सुझाव दिएका छन् ।

नेकपा अध्यक्ष प्रचण्डले मंगलबार बिहानै महरालाई फोन गरेर उनीमाथि लागेको यौन दुर्व्यवहारको आरोपबारे बुझेका थिए ।

आरोपबारे सत्यतथ्य छानबिन गर्नका लागि प्रचण्डले महराको सहयोग आवश्यक पर्ने बताएका थिए । ‘गम्भीर आरोप लागेको छ । अहिलेका लागि सत्यतथ्य छानबिन आवश्यक छ । यसमा तपाईंले सहयोग गर्नुपर्‍यो,’ सभामुख महरासँग गरेको कुराकानीबारे अध्यक्ष प्रचण्ड निकट स्रोतले भन्यो ।

जवाफमा महराले आफू अनुसन्धानका लागि सहयोग गर्न तयार रहेको बताएका थिए ।

महरामाथि लागेको आरोपका विषयमा प्रचण्डले गृहमन्त्री रामबहादुर थापा (बादल)सँग पनि बुझेका छन् ।

महरामाथि लागेको आरोपका विषयमा अर्का अध्यक्ष तथा प्रधानमन्त्री केपी शर्मा ओलीसँग छलफल गर्नका लागि प्रचण्ड प्रधानमन्त्रीको सरकारी निवास बालुवाटार पुगेका जनाइएको छ ।

‘सभामुखबारे कस्तो निर्णय लिने भनेर छलफलका लागि अध्यक्ष प्रचण्ड अर्को अध्यक्ष तथा प्रधानमन्त्रीज्यूसँग छलफल गर्न बालुवाटार जानु भएको छ,’ प्रचण्ड निकट स्रोतले भन्यो ।

Leave A Reply

Your email address will not be published.