कोरोना अस्पतालबाट सामान चोरी भएको होइन, स्टोरसम्म ओसारपसार गरिएको हो – डा. अधिकारी

0

चितवन। कोरोना नियन्त्रण कार्यदल भरतपुरका सदस्य सचिव डा. भोजराज अधिकारीले कोरोना अस्पतालमा चोरी भएको नभएर कार्यदलको स्टोरसम्म सामान ओसारपसार गरिएको बताएका छन् । मंगलबार कार्यदलको तर्फबाट प्रेस विज्ञप्ति जारी गर्दै उनले यस्तो बताएका हुन् ।

‘अस्पतालसँग सम्बन्धित केही सञ्चार माध्यममा आएको र सिसीटिभी क्यामराको फुटेज भनी प्रसारित सामग्री सन्दर्भमा हाम्रो ध्यानाकर्षण भएको छ’ डा. अधिकारीद्वारा जारी विज्ञप्तिमा भनिएको छ, ‘कोरोना नियन्त्रण कार्यदलले खरिद गरेको र विभिन्न संघसंस्थाबाट सहयोगार्थ प्राप्त सबै सामग्रीको दाखिला प्रमाण, बिल र वितरणको विवरण साथै बाँकी बक्यौता सामग्रीको लगत सही सलामत नै राखिएको छ ।’

भरतपुर कोरोना विशेष अस्पताल ७२ घण्टामा विशेष परिस्थितिमा विपत्ति सामना गर्न तयार गरिएपनि अस्पतालका लागि खरिद प्रक्रिया प्रचलित कानुनमा रहेर गरिएको विज्ञप्तिमा उल्लेख छ ।

कार्यदलको सोमबार बसेको बैठकले आयव्यय विवरण अनुमोदन गरिसकेको छ । कोरोना अस्पतालको स्थापना, सञ्चालन र व्यवस्थापन कोरोना नियन्त्रण कार्यदल, भरतपुरबाट गरिँदै आएकोमा कोरोनाको प्रभावको आधारमा यसको समय लम्बिन सक्ने कुरालाई अनुमान गरी भरतपुर अस्पतालले सञ्चालन गर्ने गरी समझदारी भएपश्चात् सम्पूर्ण अस्पतालको बरबुझारथ गर्नुपर्ने भएकोले र कोरोना नियन्त्रण कार्यदलको स्टोर र कोरोना विशेष (अस्थायी) अस्पतालको स्टोर एउटै हलमा रहेकोले कोरोना नियन्त्रण कार्यदलको स्टोर फरक ठाउँमा व्यवस्थित गरिएको उक्त विज्ञप्तिमा जनाइएको छ ।

कार्यदलका सामग्री ओसारपसार, स्टोर गर्ने समय प्रक्रियाको सिसिटिभी फूटेज लिक भएकोप्रति कार्यदल गम्भीर भएको जनाउँदै विज्ञप्तिमा भनिएको छ, ‘सोमबारको बैठकबाट चितवन उद्योग संघका अध्यक्ष तथा कार्यदल सदस्य राजु पौडेलको संयोजकत्वमा तीन सदस्यीय छानबिन टोली गठन गरिसकिएको जानकारी गराउँदै टोलीको प्रतिवेदन यथाशिघ्र सार्वजनिक गर्ने र तत्पश्चात सत्यतथ्य सार्वजनिक गरिने व्यहोरा सबैमा जानकारी गराइन्छ ।’

कोरोना भाइरस (कोभिड १९) को रोकथाम, नियन्त्रण र उपचारको पूर्वतयारीको लागि भरतपुरमा स्थापना भएको कोरोना विशेष (अस्थायी) अस्पतालको स्थापना, संचालन र व्यवस्थापन कोरोना नियन्त्रण कार्यदलको कार्यविधि अनुसार नै भएको विज्ञप्तिमा उल्लेख छ ।

रातको समयमा कर्मचारीले सामान ओसारेको सीसीटीभी फुटेज बाहिरिएपछि सामग्रीको अनियमितता भएको भन्दै अहिले यो विषयले चर्चा पाएको छ ।

Leave A Reply

Your email address will not be published.