मलाई नेपाली हुनुमा गर्व छः दिवेश पोखरेल (भिडियो अन्तर्वार्तासहित)

0

वासिंगटन डिसी । अमेरिकाको हलिउडमा अमेरिकन आइडलमार्फत तहल्का मच्चाइरहेका नेपाली युवा गायक दिवेश पोख्रेल (आर्थर गन) ले अमेरिकन आइडलको आफ्नो यात्राका क्रममा पनि नेपाली हुनुमा गर्व रहेको बताएका छन् ।

डिसी नेपालका साजिद पौडेलसँगको विशेष अन्तर्वार्तामा उनले आफूलाई भोटमार्फत अमेरिकन आइडलको हालसम्मको स्थानमा पुर्याएकोमा संसारभर फैलिएका नेपालीजनहरुप्रति मनदेखि आभार र सम्मान व्यक्त गरेको बताए । उनले भने, ‘संसारभर फैलिनुभएका नेपालीलाई मनैदेखि धन्यवाद व्यक्त गर्दछु । धेरै खुसी लाग्छ, सबैतिरबाट सपोर्ट आयो, मलाई नेपाली हुनुमा गर्व छ ।’

अमेरिकी समयअनुसार, मे ३ तारिख आइतवार टप टेनको लागि प्रस्तुति दिने तयारी गरिरहेका पोख्रेलले नेपालको संस्कृति र प्रकृति संसारभरमा अनुपम रहेकोले सबै मिलेर यसलाई जोगाउनु र फैलाउनु पर्ने धारणा राखे । उनले भने, ‘हाम्रो पुरानो संस्कृतिको रक्षा गरौं म यही भन्न चाहान्छु ।’ दिवेशको टप टेनको लागि प्रस्तुती नेपाली समयअनुसार सोमबार बिहान पौने ५ बजे प्रसारण हुनेछ । यही शोमा टप १० प्रतिस्पर्धी घोषणा हुनेछन् र १० जना बाहिरिनेछन् । यही दिन दिवेशको यात्रा अगाडि बढ्ने वा नबढ्ने पनि निर्धारण हुनेछ ।

दिवेशले अहिलेसम्मको यात्रामै आफूलाई गर्व महसुस भएको र अगाडि बढ्नको लागि आत्मविश्वास प्राप्त भएको बताएका छन् । उनले भने ‘अर्को प्रस्तुतीको लागि मेरो तर्फबाट राम्रो तयारी गरेको छु । नेपाल र विश्वभरीबाट धेरै सहयोग गर्नुभएको छ । टप १० को शोको लागि उत्साही छु ।’ उनले शोमा अगाडि बढ्दै जाँदा दबाब बढ्दै जानु स्वभाविक भएको भन्दै आत्मविश्वास पनि बढाउँदै जानुपर्ने बताए । उनले भने ‘यहाँसम्म आइसकें अब त अझै अगाडि बढ्नुपर्छ भन्ने लागिरहेको छ ।’

दिवेशले आफूलाई सानै उमेरदेखि संगीतमा रुचि भएको सम्झिए । ’घरमा दाई दिदीहरुले गाएको सुन्थें, सुन्न र गाउन दुवै मन पर्थ्यो’ उनले भने ‘यही बीचमा ममीले गितार उपहार दिनुभयो । मेरो यात्राको लागि त्यो नै सुरुवात बन्यो ।’ आमाले गितार उपहार दिएपछि दिवेशले गितार बजाउन सिक्दै गाउन थाले । सहयोग माग्दै, कोडहरु सिक्दै उनको सांगीतिक यात्रा अगाडि बढ्यो ।

यद्यपि त्यतिबेला उनी सानै थिए । उनी स्कुले नै थिए र उनले यही क्षेत्रमा करिअर बनाउने निश्चित भइसकेको थिएन । ‘त्यो ओपन स्टेज थियो, म्युजिकलाई सिरियसली लिएको थिइन’ दिवेशले सम्झे ‘स्कुले थिएँ । खेलकुदतिर पनि लागें । म्युजिकबाट अलि पन्छिएँ । तर, त्यो स्टेज कटेपछि फेरि म्युजिकमा इच्छा बढ्न थाल्यो अनि साथीहरु मिलेर ब्याण्ड बनाएर अगाडि बढ्यौं ।’ दिवेशका अनुसार उनका त्यतिबेलाका कैयौं साथीहरु अहिले पनि नेपालमा संगीत क्षेत्रमै छन् ।

यही बीचमा दिवेश अमेरिका पुगें । त्यहाँ उनीसँग खाली समय पनि बढ्यो । यही समयको सदुपयोग गर्दै उनी फेरि संगीतमै सक्रिय भए । ‘मैले गितार लिएँ अनि अभ्यास सुरु गरें’ दिवेश भन्छन् ‘यहाँ कफी शपहरुमा गएर पनि बजाउन र गाउन थालें ।’ दिवेशलाई आफ्नै एल्बम मनाउने पनि रहर थियो, उनले यतर्फ पनि काम सुरु गरे ।

अमेरिकन आइडलमा जाने योजना भने पहिलेदेखिको थिएन । ‘अमेरिकन आइडल भन्ने शो छ भन्ने थाहा थियो तर जाने योजना भने थिएन’ दिवेश भन्छन् ‘विचिटा आएपछि धेरै संगीत क्षेत्रका मानिसहरु भेटें । सबैले अमेरिकन आइडलमा जान सुझाव दिन थाले । साथीहरुले परिवारबाट पनि जान सुझाव आएपछि ट्राइ गरिहालौं न त भनेर गएको थिएँ ।’ अमेरिकन आइडलको अडिसनमै प्रशंशा भएपछि भने उनी झनै प्रेरित भए ।

अडिसनमा दिवेशले क्रिडेन्स क्लियरवाटर रिभाइभ्डको ‘ह्याभ यु इभर सीन द रेन…’ गाएका थिए । उनले पछि अर्को शोमा पनि यही गीत गाए । यद्यपि दोस्रो पटक उनले यो गीतको वास्तविक संगीत र लयमा केही परिमार्जन गरेका थिए । उनले यही गीत किन रोजे ? दिवेश भन्छन् ‘मैले मेरो म्युजिकल जर्नी स्टेजमा देखाउन चाहेको थिएँ । यो मैले सानैदेखि सुनेको गीत हो । यही गीत सुन्दा सुन्दै म संगीतमा आकर्षित भएको थिएँ ।

दिवेशले २ वर्षअघि ‘ग्रहण’ नामक एल्बम पनि निकालेका छन् । यो एल्बमको काम सन् २०१७ मा सुरु भएको थियो र यसको पहिलो गीत ‘प्रलय’ नेपालमै रेकर्ड भएको थियो । पछि स्टेजमा फर्किएपछि उनलाई पूरै एल्बम निकाल्न मन लाग्यो । ‘मैले सानैमा लेखेका केही कविताहरु समेत जोडेर केही गीतहरु बनाएँ’ उनले भने ‘केही गीतहरु भने पछि लेखेको थिएँ ।’

डिसी नेपालसंग दिवेश पोखरेल (Arthur Gunn) लाइभ

डिसी नेपालसंग दिवेश पोखरेल (Arthur Gunn) लाइभ

Posted by DCnepal on Saturday, May 2, 2020

Leave A Reply

Your email address will not be published.