१५ हजार भारु राखेर बाँडिएको विषयमा आमिर भने: ‘पैसा हाल्ने व्यक्ति होइन’

0

एजेन्सी । यसबेला भारतमा लकडाउन जारी छ । कोराना भाइरस संक्रमणबाट प्रभावित भएको भारतमा गरिब र असाहय मानिसहरुलाई सहयोग गर्नेहरु पनि बढिरहेका छन् । त्यसमा उद्योगपति, राजनीतिक कर्मीहरुदेखि सिने कलाकारहरु पनि अघि देखिएका छन् ।

बलिउड नायकहरु अक्षयकुमार, सलमान खान, शाहरुख खान, अजय देवगन लगायतले गरिब र असाहयहरुलाई सहयोग गरेका खबरहरु बाहिर आइरहेका छन् । केही दिन पहिले भारतमा एउटा भिडियो भाइरल भयो । उक्त भिडियो अर्का नायक आमिर खानसँग जोडिएको थियो ।

त्यस भिडियोमा आँटाको पिठोको झोलामा नोट राखिएको र गरिबहरुलाई बाँडिएको भनिएको थियो । बलिउड नायक आमिर खानले आँटाको पिठो भरिएको झोलामा भारतीय रुपैयाँ राखेर बाँडिएको भिडियो भाइरल भएपछि उक्त विषयले चर्चा पाएको थियो । तर यो भिडियो र खबर हल्ला मात्र भएको पुष्टि भएको छ ।

यसबारे नायक आमिर खानले मुख खोलेका छन् । उनले सोमबार ट्वीट गर्दै यो हल्लाको खण्डन गरेका छन् । उनले आफु पैसा बाँड्दै हिड्ने व्यक्ति नभएको स्पष्ट पार्दै सबैलाई सतर्क र सुरक्षित रहन आग्रह गरेका छन् । उनले भनेका छन्, ‘मित्रहरु म गहुँको बोरोमा पैसा हाल्ने व्यक्ति होइन, यो कि त पूर्णरुपमा नक्कली कहानी हो, वा रोबिन हुड आफुलाई प्रकट गर्न चाहाँदैन । सुरक्षित रहनुहोस् ।’

टिकटकमा बनाइएको यो भिडियोमा आमिर खानले ट्रकमा गहुँको पिठो लगेर दिल्लीमा केही गरिबहरुलाई बाँडेको भनिएको छ । भिडियोमा गरिबहरुका बस्तीमा बाँडिएको एक–एक किलोका पिठोका बोराभित्र १५ हजार भारु राखिएको बताइएको छ ।

Leave A Reply

Your email address will not be published.