कुवेतबाट नेपाली कामदारको गुहार (भिडियो)

0

काठमाडौँ– खाडी मुलुक कुवेतको आदानस्थित एक क्याम्पमा दुई सय जना नेपाली कामदार बसेका छन् ।

कोरोना भाइरसको महामारी फैलिएपछि कुवेत सरकारले उनीहरूलाई मे २६ तारिखदेखि आदानको दुई तले एउटा विद्यालयमा क्याम्प बनाएर राखेको हो ।

कोरोना संक्रमणको त्रासबीच एउटै सानो क्याम्पमा दुई सय कामदार बस्नु परेको छ । साँघुरो ठाउँमा अक्सिजनको अभाव महसुस हुने गरेको छ ।

‘कोठामा थुनिएको २२ दिन भइसकेको छ । बाहिर जान मिल्दैन, सुरक्षा गार्ड गेटमै बस्छन् । रातदिन कोठामा बस्दा बिरामी हुन थालिसक्यौँ,’ क्याम्पमा बसेका कामदार अमरबहादुर सेनले खबरहबसँग भने, ‘एउटै कोठामा डेढ सयभन्दा बढी छौँ कसरी बसिरहेका हौँला, सोच्नुस त !’

उक्त विद्यालयको क्याम्पमा रौतहट, उदयपुर, रोल्पा, पाँचथरलगायत जिल्लाका कामदार छन् । रोजगारीका लागि गएका उनीहरूको अवस्था अहिले दयनीय बनेको छ । वैदेशिक रोजगार बोर्डका अनुसार कुवेतमा करिब ५० हजार नेपाली कामदार छन् ।

पैसा कमाएर परिवार सुखी बनाउने उत्साहका साथ कुवेत पुगेका अमर र उनका नेपाली साथीहरू अहिले संक्रामक रोग कोरोना भाइरसको जोखिममा छन् ।

‘काम छोडेको तीन महिना भइसक्यो अर्काको देशमा संक्रमणको जोखिम मोलेर कति दिन बस्ने !’ अमरले खबरहबसँग भने, ‘स्वदेशमा रहेका परिवारको चिन्ता उत्तिकै छ, सरकारले उद्धार गरोस् भन्ने हाम्रो आग्रह छ ।’

कुवेतमा अलपत्र नेपाली कामदारको गुहार

blob:https://www.facebook.com/48355980-57a6-49b0-b3a8-40815d7fca91

कुवेत सरकारले आफ्नै टिकटमा त्यहाँ रहेका नेपाली कामदारलाई स्वदेश फर्काउने जनाउ दिएकेको छ । नेपाल सरकारले बेवास्ता गर्दा विदेशी भूमिमै मरिने पो हो कि भन्ने त्रास उनीहरूमा बढ्न थालेको छ ।

अमरका अनुसार कुवेतस्थित नेपाली दूतावासले अप्रिल २४ तारिखमा एकतर्फी ट्राभलका लागि आवेदनसमेत मागेको थियो ।

‘स्वदेश फर्किन पाइने खुसीमा अप्रिल २४ तारिखमा फर्म भरेको आज मे १७ भइसक्यो’ निराश अमरले भने, ‘केही दिनअघिदेखि दूतावास पनि सम्पर्कविहीन छ ।’

पाँचथर घर भएका फूलकुमार राउतले भने, ‘सरकारले हाम्रो उद्धारमा हेलचेक्र्याइँ गर्‍यो, दूतावासलाई फोन गर्दा सुरक्षित भएर बस्नुस् मात्र भन्छ ।’

कोरोनामात्रै होइन भिडभाड र अत्यधिक गर्मीका कारण अरू रोग लाग्ने जोखिम पनि उत्तिकै छ ।

‘बस्ने ठाउँमा यस्तो भीड छ, कसरी सुरक्षित रहने ?’ प्रश्न गर्दै फूलकुमारले खबरहबसँग भने, ‘अत्यधिक गर्मी छ, कोरोनामात्रै होइन, अन्य संक्रामक रोग लाग्ने जोखिम पनि बढेको छ ।’

क्याम्पमै बिरामी पर्दै

उक्त क्याम्पमा बसेकाहरूमा अहिलेसम्म कोरोना संक्रमण देखिएको छैन तर खचाखच बस्नुपर्दा उनीहरू बिरामी पर्न थालेका छन् । कतिपयलाई रुघाखोकी लाग्न थालेको भए पनि उपचारको प्रबन्ध नभएको उनीहरूको गुनासो छ ।

उद्धारका लागि विभिन्न सञ्चारमाध्यममार्फत हारगुहार गरिरहेको बताउँछन् उदयपुर घर भएका सुवास राई ।

‘खानाको समस्याका कारण बिरामी पर्न थालेका छौँ, साथीहरू ढल्न थालिसके,’ उनले भने, ‘हाम्रो स्वास्थ्य अवस्था बिग्रिँदै गइसक्यो ।’ सुवासका अनुसार बिहान र बेलुका खानाको व्यवस्था कुवेतको सरकारले गरेको छ तर खाजा दिएको छैन ।

‘कहिले पानी तताएर पिउँछौं, कहिले सरसफाइ गर्न आउने कर्मचारीलाई औषधि ल्याउन लगाएर मुश्किलले बसेका छौँ,’ उनले भने, ‘यसरी कति दिनसम्म बस्ने ! एक महिना पुग्न लागिसक्यो, कोरानाभन्दा पनि अरू नै रोगले लान्छजस्तो भइसक्यो ।’

कुवेतबाट भारत, बंगलादेश, इजिप्ट, सुडान लगायतका देशहरूले आफ्ना नागरिकलाई फिर्ता गरिसकेका छन् । नेपालले भने विदेशमा रहेका आफ्ना नागरिकलाई स्वदेश फर्काउने निर्णय अझै गर्न सकेको छैन ।

कुवेतमा अलपत्र नेपाली चेलीको याचना

Leave A Reply

Your email address will not be published.